Magaalada Birmingham ayaa waxaa ku nool qaar badan oo ka mid ah bahwaynta sport ga soomaaliyeed gaar ahaan kuwii ayagu kaalinta wax ku oolka ah ka soo galay sare u qaadida sport ga dalka gaar ahaan kubadda cagta iyo kolayga kuwaaso ka dib markii ay wada sheekaysi iyo xogwaraysi dhinaca isgaarsiinta wada yeesheen bahda reer London gaar ahaan maamulka ururka SSAU oo ay dhawaantan qaar ka mid ah bahdani ku aas aaseen magaaladan London waxa ay casuumad u fidiyeen bahdan si dib loogu soo nooleeyo isk warqabkii iyo xogwaraysigii bulshadan dhexdooda ahayd isla markaana ay uga arinsan lahaayeen sidii ay wada shaqayn joogta ahi u dhexmari lahayd labadan bahood.

Xaflad aad loo agaasimay ayna ka soo qaybgaleen bahwaynta sport ga ee Birmingham gaar ahan kuwooda hormuudka ah, warfidyeeno ka socday telifishanka caalamiga ah ee ETN, martisharaftii ka socotay ururka SSAU iyo cayaartoydii cuslaatay ee Birmingham iyo reer London ayaa ugu horeyntiiba waxa ay ka dhacday  maqaayad ku taala martamaha xaafadda ay jaaliyadda soomaaliyeed ka degan tahay magaalada Birmingham waxaana halkaasi ku soo dhaweeyey bahdan Ibraahim (Ex kubadda cagta Waxool) iyo Cali Guray (Ex kubadda kolayga Madbacadda) ayagoo uga mahadceliyey reer London sida walaaltinimada leh ee ay uga soo jawaabeen martiqaadkoodii isla markaana ku amaaneen sida ay ugu dadaalayaan isku keenidda iyo aruurinta bahwaynta sport ga si looga gudbo qiimayn la'aanta iyo bahdilka lagu hayo bahdan gudaha iyo dibadda dalkaba.

Waxaa asaguna halkaasi ka hadlay guddoomiye ku xigeenka xiriirka K Kolayga soomaaliyeed garsoore Maxamed Xaaji oo sidoo kale amaan u soo jeediyey reer London iskuxirnaanta iyo dadaalka ay muujiyeen wuxuuna kula dardaarmay in ay halkaasi ka sii wadaan isku aruurinta bahdan dhinacoodana reer Birmingham ahaana ay diyaar u yihiin in ay kala shaqeeyaan mawqifkaasi.

Intaasi ka dib ayaa waxaa waxaa halkaasi ka hadlay Siciid Axmed Kaytoon oo ka tirsanaan jiray cayaartoydii kubadda cagta ee naadigii Sancada oo asagu ku hadlayey magaca ururka SSAU wuxuuna uga mahadceliyey bahda reer Birmingham martiqaadkan sharafta badan asagoo dhinaca kalena waxyar uga taabtay ulajeedada iyo baahidii keentay in la aas aaso ururkan kaasoo sida uu sheegay aan cidna duulaan ku ahayn soona dhawaynaya cid kasta oo danaynaysa horumarinta ubadka yaryar.

Waxaa asaguna halkaasi ka hadlay guddoomiyaha ururka cayaartoydii hore Maxamed Shidane Buraale (Horseed) oo mahadcelin ka dib ku celiyey ulajeedada ugu wayn ee loo aas aasay ururkan oo ah sidii loo midayn lahaa shaqada ay bahdani u hayaan dhalinyarada isla markaana looga bixi lahaa isbarbaryaaca iyo qiimayn la'aanta cayaartoydii hore oo ayagu magaca iyo sharafta ku lahaa bulshadan taasoo hadda u muuqata mid ay sii baaba'aysa.

Intaasi iyo cashadii sharafta badnayd ee loogu talagalay xafladda ayaa waxaa halkaasi waraysiyo kala gedisan uu telifishanka ETN kual yeeshay qaar ka mid ah madaxda ururka iyo waliba cayaartoydii hore.

Ka dib ayaa waxaa loo dareeray garoon dedan oo lagu cayaaro kubadda cagta (Futsalka) waxaana halkaasi isaga horyimid cayaartoydii cuslaatay ee magaalooyinka Birmingham iyo London waxaana ay si dirqi ah 3-2 (Sets) guushii kuraacday kooxdii reer London inkastoo reer Birmingham ay ka xishoonayeen reer London sida ay noo sheegeen C/Casiis Eenow iyo Ibraahim Cabdulle.

Akhristow waxaa xusid mudan in habeenkaasi uu ahaa bahdan habeen xasuus mudan waxaana halkaasi isku arkay cayaartoy ayagu aan is arag muddo 20 sano ka badan kuwaasoo aan ka xusi karo cayaartoydii hore ee naadigii madbacadda qarana Maxamed Xuseen "Majabe" oo asagu ku nool dalka Canada martina u ahaa bahda reer London iyo Xasan Baydhabo oo asaguna ku nool magaalada Birmingham kuwaasoo habeenkaasi aad arkaysay sida ay ugu faraxsanaayeen kulankan.

Si kastaba ha ahaatee waxaa lagu balamay in la joogteeyo lana balaariyo kulamada noocaan oo kala ah taasoo qayb wayn ka qaadan karta iskuxirnaanshaha iyo midaynta bahdan waxaana haddii alaha awoodda lihi ogolaado ay reer Birmingham booqasho ku imaan doonaan magaalada London usbuucyada foodda inagu soo haya.

xigasho cayaaraha.